Следи нѐ
To Top

Отворени пет нови авиолинии од Скопскиот аеродром

Од скопскиот аеродром „Александар Велики“ од денеска се воведени директни авиолинии кон Осло и Фридрихсхафен, дел од најавените пет нови дестинации на нискобуџетната авиокомпанија „Визер“ сo субвенции од македонската Влада. 

Првиот лет до Осло се реализираше изутрината во 6 часот, а до Фридрихсхафен попладне во 13 часот и 30 минути. Утре во 18 часот и 25 минути од „Александар Велики“ ќе замине и првиот авион на „Визер“ за новата дестинација Барселона со што Македонија првпат воздушно ќе се поврзе со Шпанија. Задутре, пак, скопскиот аеродром ќе ги отвори новите линии до Хамбург во 6 часот и 15 минути наутро, како и до Нирнберг во 13 часот и 15 минути попладне.

реклама

На новите линии кон европските градови „Визер“ ќе сообраќа двапати неделно. За Фридрихсхафен секој понеделник и петок, за Барселона во вторник и сабота, а за Хамбург и Нирнберг во среда и во недела. Цените на билетите се од 1.200 денари.

– Со воведување на новите линии создаваме можност преку достапни цени на авиобилетите да се посетат најпосакуваните и најатрактивните градови во Европа. Создадовме услови и граѓаните на Македонија преку евтини билети да можат полесно да патуваат до европските метрополи во функција на развој на економијата, образованието, културата, здравството и туризмот, рече на промоцијата на летовите министерот за транспорт и врски Владо Мисајловски.

Според него, владините политики за субвенционирање нови авиолинии имаат резултати и се оправдани. Компанијата „Визер“ од 2012 година досега преку финансиската поддршка од Владата воведе 20 дестинации до европски градови и превезува половина од вкупниот број патници, односно 50,2 проценти. Мисајловски очекува со новите дестинации годинава бројката значително да се зголеми.

– Генерално сум задоволен како се зголемува бројот на патници кој од почетокот на годината постојано расте. Заклучно со мај превезени се над 506.000 патници што е зголемување за 17 проценти во споредба со претходната година. Останува предизвикот за оваа Влада бројката од 1.278.000 патници кои поминаа лани низ македонските аеродроми, оваа година да ја зголемиме дополнително токму преку новите линии, рече Мисајловски.

Согласно договорот со „Визер“ за субвенционирање авиолинии за периодот од 2015 до 2018 година од 1 јули од охридскиот аеродром ќе се воведе директна линија до Базел. Оваа авиолинија, според Мисајловски,  ќе придонесе за поголемо искористување на капацитетите на аеродромот „Св. Апостол Павле“ во Охрид, како и за привлекување нови странски туристи, странски инвестиции и економски раст и развој на Охрид.

– Преку евтините летови придонесовме за зголемување на бројот на странски туристи. Минатата година бележиме раст од над пет проценти на бројот на туристите, посочи Мисајловски.

Портпаролот на „Визер“ Даниел де Карваљо информира дека со петте нови авиолинии вкупниот број на новите дестинации што ги опслужува „Визер“ од Скопје се зголеми на 19.

Лани од Македонија превезле околу 600 илјади патници. Воздухопловната база во Скопје ја зголемуваат со уште еден авион Ербас А320, инвестиција од околу 80 милиони долари.

Според Зоран Крстевски, генерален директор на ТАВ Македонија, со отворањето на новите авиолинии се очекува натамошен пораст на сообраќајот и бројот на патници на „Александар Велики“.

–  Во изминатите пет месеци  имаме зголемување на сообраќајот за 17 проценти, а до денеска на двата аеродрома 624.555 патника. Исто така имаме зголемување на бројот на операции  на авионите кој до денеска изнесува 6.641 или за 6,4 проценти во однос на минатата година, рече Крстевски.

ПОВЕЌЕ ОД КАТЕГОРИЈАТА: Актуелно

реклама
error: Содржината е заштитена со авторски права.