Следи нѐ
To Top

Вечерва „Бела ноќ“ во Скопје: Бесплатни автобуси на ЈСП, филмски маратон и концерт на С.А.Р.С

Во Скопје вечер ќе се одржува 11-тата манифестација „Бела ноќ“ која ќе понуди голем број настани од културата – изложби, концерти, читања и филмски маратон, со вклученост на сите институции од културата во главниот град.

Официјалното отворање на годинашната „Бела ноќ“ е во Музеј на Македонија во 20.30 часот, со изложбата „Црвен петел, црна кокошка: култови на плодност, обреди, обичаи и верувања“. Изложбата претставува дел од култовите на плодност што се практикувале на територијата на Македонија од предисторијата до денес. Предисториските женски фигурини, античките садови и ламби ја претставуваат археолошката манифестација на овие култови.

реклама

Во исто време на плоштадот „Пела“ ќе се одржува модна ревија на модното студио „Црнокрак“.

Отворени за посетители во текот на ноќта ќе бидат и Музеј на Град Скопје, каде што ќе биде поставена изложбата „Ерос и Танатос“, Националната галерија на Македонија, објект Мала станица (изложба „Во кој свет живееме“), Културно-информативниот центар („Четири пози“), Куршумли ан („Зигот“), Галеријата на Младинскиот културен центар („Протест – Сексплозија“), холот и платото на МКЦ („Времено ’52“ – изложба на Антони Мазневски), специјална поставка ќе има во Галерија Грал, мултимедијален перформанс „East meets West“ во фоајето на кино „Фросина“…

Настани ќе има и пред платото на Спомен-куќата на Мајка Тереза, во Градската библиотека „Браќа Миладиновци“, во Домот на културата „Кочо Рацин“, Детскиот креативен центар, Дом на АРМ, како и на улица „Македонија“. Концерти ќе има кај Школка во Градски парк од 20 часот и од 21 часот на платото на Младинскиот културен центар.

Во организација со Општина Карпош, и Скопје Сити Мол ќе се приклучи во прославата на познатата Бела Ноќ во Скопје во свој стил, со богата музичка програма насловена како „Ем умеам, ем можам“ со цел што поатрактивно да го одбележи и својот 3-ти роденден.

Разновидната програма започнува во 12 часот во сабота каде први ќе настапат децата од основните училишта од општина Карпош во склоп на детската програма, додека во 13:40 атмосферата ќе ја раздвижат од Рок Бендот „Другарите од средно“. Еден час подоцна забавата ќе продолжи со ДЈ Капони, во 16 часот продолжува Лили, а во 17:00 настапува Реквием Бенд. Дополнително, пејачката Нина Јанева заедно со својот бенд, ќе се приклучи на забавата во вечерните часови во 18:00 часот. Во 20:15 часот ќе се оддржи поздравен говор, а во 20:30 пред македонската публика токму во Скопје Сити Мол, свој концерт ќе имаат мега популарните С.А.Р.С. за прекрасен финиш на прославата на 3ти октомври.

Во кино „Милениум“ од 12 часот, како и во минатите изданија на „Бела ноќ“, ќе има 24-часовен бесплатен филмски маратон. Организаторите соопштија дека билети за проекциите може да се подигнат на билетарницата на кино „Милениум“ денеска од 10 часот.

Во Зоолошката градина, пак, ќе има попладневно матине и бесплатен влез од 17 до 19 часот, а во тој период бесплатен ќе биде и превозот со автобусите на ЈСП  8 и 15А кои поминуваат пред ЗОО. Од 19 часот превозот ќе биде бесплатен во сите автобуси на ЈСП „Скопје“ кои сообраќаат кон Центар.

ПОВЕЌЕ ОД КАТЕГОРИЈАТА: МК Сцена

реклама
error: Содржината е заштитена со авторски права.