//
Следи нѐ
To Top

Бесплатен јавен превоз во Скопје до намалување на аерозагадувањето

Градот Скопје од утре воведува бесплатен јавен превоз во сите автобуси на ЈСП Скопје и кај приватните превозници за сите граѓани на територија на Скопје се до моментот на намалување на аерозагадувањето, соопшти на денешната прес-конференција градоначалникот Коце Трајановски.

Превозот ќе биде бесплатен се додека нивото на аерозагадувањето не се намали до дозволеното ниво.

реклама

Град Скопје заедно со општините ќе ја интензивира контролата на градилиштата и  ЈП „Комунална хигиена“ ќе продолжи со интензивно миење на градските улици и булевари.

Овие мерки и препораките кои ги донесе Трајановски се во согласност со Законот за намалување на амбиенталниот воздух и во насока на намалување на загадувањето на воздухот, а се во согласност со ингеренциите што ги има како градоначалник на Град Скопје.

Трајановски  апелира до вработените во Град Скопје да доаѓаат на работа со автобус и додаде оти службените возила ќе ги користат исклучиво градскиот инспекторат.

– Доколку дозволат временските услови Град Скопје ќе продолжи да ги прска градските улици со средството калциум магнезиум ацетат, рече Трајановски и додаде дека за тоа имаат доволен број возила и средства.

Според него, согласно постојните закони не може да се воведе мерката пар-непар. Трајановски апелираше до министерствата да се измени Законот, со што ќе се овозможи воведување на оваа мерка во Град Скопје. 

– Град Скопје и јавните градски претпријатија ќе ги ослободат од работа лицата над 60-годишна возраст, лицата со хронични заболувања и бремените жени, рече Трајановски.

Град Скопје изминативе денови вршел интензивен инспекциски надзор на инсталациите што се во негова надлежност и извршил контрола над 36 инсталации со мерење на емисиите на ПМ 10 честички. – Утврдено е дека ниту една инсталација во наша надлежност не ги надминува граничните вредности, рече Трајановски.

Во врска со шпекулациите што се појавија во јавноста дека топланите го загадуваат главниот град, Трајановски информира дека инспекцискиот надзор спроведен од Град Скопје викендов во сите топлани, а тоа се Топлификација АД – Топлана Скопје Север, Балкан Енерџи Груп, АД ЕЛЕМ Енергетика, Топланата на Клиничкиот центар и Топланата на Болницата „8 Септември“ покажале дека сите топлани работат исклучиво на гас, односно не загадуваат и не поседуваат никаква залиха на мазут или нафта.

– Комуналните инспектори на Град Скопје во изминатиов период направија 1.000 контроли и изрекоа 12 казни на компании заради непочитување на одредбите на Одлуката за комунален ред во Скопје, потенцира Трајановски.

Тој го повикува Министерството за животна средина и просторно планирање, Државниот инспекторат за животна средина и општините да извршат засилени контроли над инсталациите што се под нивни ингеренции. Нагласи дека инспекцијата на Град Скопје ќе продолжи со засилени вонредни ноќни дежурства и контроли на инсталациите што се во нивна надлежност.

Скопскиот градоначалник побара од Министерството за внатрешни работи да ги зајакне контролите за почитување на забраната за движење тешки товарни возила чија крајна дестинација не е Град Скопје и да се упатуваат да ја користат скопската обиколница, во согласност со поставената сообраќајна сигнализација.

– Овие мерки и препораки ќе важат се до надминување на настанатата ситуација со загадувањето на воздухот, односно до намалување на загадувањето под прагот на алармирање, нагласи Трајановски.

Одговарајќи на новинарско прашање, Трајановски рече дека утре ќе дојде на работа со автобус.

За загадувањето во Карпош, посочи дека немаат сознанија и додаде оти се испратени инспекторите на терен, дополнително по јавувањата од граѓани и информациите од медиумите. На депонијата „Дрисла“ информира дека согорува само медицински отпад, а за Годел нема информации.

Трајановски потсети дека од 2009 година до сега Град Скопје има многу направено за намалувањето на загадувањето. Набавени се повеќе од 300 автобуси за ЈСП Скопје со еуро стандаради, повеќе од 100 камиони за ЈП „Комунална хигиена“, засадени се огромен број дрвца, подигнати се над 300.000 метри квадратни зеленило, проширени се булеварите, воведен е Центар за управување и контрола на сообраќај…

ПОВЕЌЕ ОД КАТЕГОРИЈАТА: Вести

реклама
error: Содржината е заштитена со авторски права.
%d bloggers like this: