Поврзи се со нас

Популарно.мк

Даниел Дончевски по петти пат го фати светиот крст во Скопје

Вести

Даниел Дончевски по петти пат го фати светиот крст во Скопје

Даниел Дончевски од Ченто по петти пат го фати Светиот крст во водите на реката Вардар што денеска напладне од мостот „Слобода“ кај „Холидеј ин“ го положи архиепископот охридски и македонски г.г. Стефан.

Дончевски на сите им посака среќа и бериќет.

„Пред се сакам на сите мои христијани да им го честитам големиот празник Богојавление – Водици, да им посакам здравје, среќа, љубов и да бидеме вака сплотени секоја година во мир, секој ден да се покајуваме и вака да го празнуваме со љубов и со вистинска вера нашиот христијански празник“, рече Дончевски.

Рече дека годинава, покрај за здравје за својата фамилија, скокал по крстот и за , како што рече, еден мал јунак Биле Пешевска, херој што се бори против болест поради која многу би се откажале од неа.

Пред положувањето на Светиот крст во водите на Вардар, г.г. Стефан пред присутните граѓани порача дека верските празници треба да не потсетат како живееме и како постапуваме кон себе и кон другите, да ги измијат сите лоши мисли и да донесат духовно освежување.

„Не е доволно да бидеме само крстени, туку е потребно и да живееме според учењето и заповедите на христовата вера. Не по името, туку по делата да бидеме вистински христијани“, порача г.г Стефан.

За фаќање на крстот во Скопје беа пријавени над 150 граѓани.

Богојавление – Водици се празнува уште од вториот век. Поврзан е со крштавањето на Исус Христос во водите на реката Јордан од страна на свети Јован, кој од тогаш се нарекува Крстител. Празникот се нарекува уште и Водици поради големиот водосвет што го извршува црквата на овој ден.

Традиционално, во реките се положуваат крстови, а оној што ќе го фати Светиот крст се верува дека ќе го следи благослов и среќа во текот на целата година. Фаќањето на крстот значи соединување на човекот со Христа, а се верува дека со спуштањето на крстот водите се осветуваат и стануваат лековити.

Претходно, од 9 часот, поглаварот на МПЦ г.г. Стефан богослужеше Златоустова литургија во црквата „Рождество на Пресвета Богородица“.

Информативна Редакција

Главниот и одговорен уредник на веб порталот Популарно.мк. Ѓорги е перспективен новинар кој со својата креативност и талент го направи Популарно.мк дел од водечките информативни сајтови во Македонија. Во исто време е регионален известувач за CNN од Македонија и главен на продукцијата GPTM Production.

Повеќе од Вести

ДО ВРВ
error: Содржината е заштитена со авторски права.