//
Следи нѐ
To Top

Утре со концертот на легендарните КРАФТВЕРК почнува 20-тиот ТАКСИРАТ!

ТАКСИРАТ Фестивал годинава го прославува својот голем јубилеј и со богата концертна програма во текот на целата година го одбележува своето 20-то издание!

По овој повод, првиот во низата ексклузивни настани на Таксират е, ни повеќе ни помалку туку концертот на германските пионери на електронската музика, легендарните КРАФТВЕРК кој ќе се одржи утре (27-ми февруари) во Вип Арена „Борис Трајковски“ во Скопје!

реклама

КРАФТВЕРК гостуваат во Скопје по 13 години од нивниот прв настап кај нас, кој сѐ уште важи за еден од најдобрите концерти кои било кога се одржале во Македонија, а овој пат ексклузивноста на нивното гостување е збогатена и со спектакуларното 3-Д визуелно шоу кое е дел од нивните концерти на исклучително успешната актуелна турнеја!

За таа цел, секој од посетителите, при влезот на концертот ќе добие и брендирани 3-Д очила. КРАФТВЕРК доаѓаат во Скопје со огромен тим кој ќе се погрижи овој концерт да биде доведен до перфекција и кој работи на комплетната техничка и продукциска реализација на секој од концертите во нивната турнеја.

Вратите на арената ќе бидат отворени за посетителите од 19:00 часот, а почетокот на концертот е точно во 20:30 часот. Поради големиот број на посетители и со цел да се избегнат гужвите, за време на концертот во арената „Борис Трајковски“ во функција ќе бидат повеќе влезови: главен влез (југ), ВИП влез (запад – од страна на лизгалиштето) и страничен влез (исток – од страна на базенот).

Сите оние кои своите билети ги купиле онлајн ги известуваме дека нема да се врши замена на ваучерите за билети, туку задолжително треба да ги испечатат електронските ваучери (PDF документот во нивниот и-мејл) и да ги приложат при влез на концертот заедно со документ за лична идентификација. Оние онлајн купувачи пак кои сепак преферираат да имаат класичен билет за нивните колекционерски потреби, ќе можат да ја направат оваа замена веднаш по завршувањето на концертот, на билетарницата во арената „Борис Трајковски“.

При влегувањето на концерт сите посетители ќе се претресуваат за проверка на предметите кои тие ги внесуваат. Во концертната сала, покрај храна и пијалоци како и вообичаено забранетите предмети, не смее да се внесува професионална и полупрофесионална аудио и видео опрема за снимање и пренос на концертот, што вклучува камери и фотоапарати со кои може да се користи објектив.

На посетителите на концертот на располагање им е и паркингот на Вип Арена „Борис Трајковски“ но поради неговиот лимитиран капацитет и големиот број на посетители, а со цел да се избегне гужвата, наша препорака е да го користите јавниот превоз или околните паркинзи за возилата.

Сите заинтересирани посетители кои сѐ уште не ги набавиле своите влезници за концертот на КРАФТВЕРК ги известуваме дека фан-пит и партер билетите се целосно распродадени, а преостанатите билети за трибините, можете да ги купите преку продажната мрежа на МКтикетс или онлајн на овој линк.

КРАФТВЕРК е една од највлијателните и најзначајните електронски групи во светот чие музичко наследство е легендарно и вонвременско! Како предводник на експерименталната сцена, со својата визија за иднината КРАФТВЕРК ја создаде музичката подлога за дигиталната ера на 21-виот век и важат за бендот без кој модерната музика денес не би звучела исто. За време на речиси 50 години постоење КРАФТВЕРК објавуваат десет успешни студиски изданија, како и неколку компилациски и два live албум, од кои последниот „3-D The Catalogue“ го објавија во мај минатата година, а токму ова спектакуларно 3-Д концертно шоу на КРАФТВЕРК ќе имаме прилика да го погледнеме во живо на концертот во Скопје.

ПОВЕЌЕ ОД КАТЕГОРИЈАТА: МК Сцена

реклама
error: Содржината е заштитена со авторски права.