Синиот автобус на „Еураксес“ во Скопје

Студентите и истражувачите кои се наоѓаат на почетокот на својата кариера денеска ќе имаат можност да го посетат синиот автобус на „Еураскес“, кој ќе пристигне на паркингот пред Факултетот за информатички науки и компјутерски технологии -ФИНКИ. 

Посетителите во текот на денот ќе дознаат како да најдат работно место во другите држави и како да имаат пристап до фондови за финансирање.

Синиот автобус на „Еураксес“ е на турнеја низ Европа, а освен во Скопје ќе посети и други 33 градови во 16 европски држави.

„Еураксес“ – Истражувачи во движење е иницијатива поддржана од Европската истражувачка заедница, која им помага на европските и странските истражувачи да добијат информации и поддршка со цел да се стекнат со интернационална истражувачка кариера во Европа. „Еураксес“ нуди комплетен опсег на услуги потребни на еден истражувач да се стекне со меѓународна истражувачка кариера, од понуди за работа, па се до совети за преселба од една држава во друга.

Проектот „Еураксес“ во Македонија се одвива во рамки на Македонската академија на науките и уметностите.

Во амфитеатарот на ФИНКИ денеска ќе има интерактивни сесии со истражувачи, финансиери и работодавци кои ќе нудат совети за тоа како подобро да се развие истражувачката кариера.