Доделени наградите „E-commerce Awards 2025“: Ова се најдобрите е-продавници во Македонија

Во организација на Асоцијацијата за е-трговија на Македонија, се одржа свечената церемонија на „E-commerce Awards 2025“, на која беа прогласени најдобрите е-продавници и е-трговци во земјава.

Целта на оваа иницијатива е да ги препознае најуспешните компании во секторот на онлајн трговијата и да придонесе за зголемување на довербата кај купувачите, како и за континуирано подобрување на услугите во е-трговијата.

Годинава интересот беше голем – над 36.000 гласови од повеќе од 4.200 гласачи, при што 60% од резултатот доаѓаше од јавноста, а 40% од оценувањето на стручна жири-комисија. Исклучок беше категоријата „Најпопуларна е-продавница“, каде победникот беше избран само со гласови од јавноста.

Во изборот беа номинирани 217 е-трговци кои се натпреваруваа во 18 категории, а на церемонијата беа доделени вкупно 38 награди.

Меѓу најзначајните победници се:

• Coslovemetics.mk – прогласен за е-трговец на годината и најпопуларна е-продавница

• Ananas.mk – победник во категоријата маркетплејс

• Telekom.mk – најдобар во категоријата е-продавница за услуги

• Zegin.com.mk – најдобра е-продавница за здравје, нега и убавина

• Korpa.mk – најдобра е-продавница за храна и пијалоци

• Neptun.mk – победник во категоријата бела техника и електроника

Доделени беа и неколку специјални признанија, меѓу кои и за меѓународна експанзија во е-трговија, промоција на Беџот за верификуван е-трговец, како и за најдобра е-продавница основана и управувана од жена.

На победниците им беа врачени статуетки и дигитални беџови, кои можат да ги истакнат на своите веб-страници како симбол на доверба и квалитет.