Една од најомилените опери повторно пред публиката – „Севилскиот бербер“ на 3 април

Едно од најпопуларните дела од светската оперска сцена, „Севилскиот бербер“, повторно ќе биде изведено пред македонската публика. На 3 април, со почеток во 20 часот, љубителите на класичната музика ќе имаат можност да уживаат во оваа духовита и енергична опера на сцената на Национална опера и балет.

Станува збор за ремек-дело на италијанскиот композитор Џоакино Росини, кое со својата динамична музика, хумор и препознатливи арии со децении останува омилено кај публиката ширум светот.

Изведбата ќе биде под диригентската палка на Бисера Чадловска, додека режијата ја потпишува австриската режисерка Урсула Хорнер. Сценографијата е дело на Марија Ветероска, а костимите ги изработи Марија Пупучевска.

Во претставата ќе настапат солисти заедно со хорот и оркестарот на Националната опера и балет, кои ќе ја донесат на сцената приказната за духовитиот и снаодлив Фигаро – лик што и денес е симбол на итрина и шарм.

„Севилскиот бербер“ важи за едно од најизведуваните оперски дела, а неговата комбинација на музика, комедија и брзо темпо го прави достапен и за публика која првпат се среќава со операта.