Магазин
Објавен официјалниот портрет на Меланија Трамп
Белата куќа го објави официјалниот портрет на првата дама на САД, Меланија Трамп.
Фотографијата е направена од белгискa фотографка Реџине Махо, која го фотографира семејството Трамп повеќе од 20 години. Фотографијата е направена на 21 јануари 2025 година. Реџине го направи и официјалниот портрет на Меланија Трамп во 2017 година.
„Навистина ми е чест што ме избраа повторно да го снимам портретот. Како уметник, голема привилегија е да се работи со таква инспиративна жена. Таа е перфекционист“, изјави фотографката за Би-Би-Си.
Официјалниот портрет на првата дама Меланија Трамп е снимен во Жолтата овална соба на резиденцијата.
За потсетување, Меланија Трамп беше една од главните теми во светските медиуми по инаугурацијата на Доналд Трамп, каде го привлече вниманието со модните комбинации. Најпрво на свечената заклетва носеше темносин капут. Изгледот Меланија го комплетираше со впечатлив шешир на американскиот дизајнер Ерик Џавитс.
За вечерните инаугуративни балови, таа носеше црно-бел фустан, дизајниран од нејзиниот долгогодишен стилист Ерве Пјер.
