Заборавете на Комо, еве зошто Охрид го освојува светот – скапоцен камен скриен од масовниот туризам

Додека италијанското езеро Комо секое лето е преплавено со туристи и станува сѐ поскапа и понатрупана дестинација, Охридското Езеро во Македонија сѐ повеќе привлекува внимание како алтернатива со недопрена убавина, длабока историја и пристапни цени.

Токму така го опишува британскиот специјализиран туристички медиум Travel and Tour World (TTW) во текстот насловен:
„Патниците од Италија, Македонија и Велика Британија откриваат неверојатно античко езерско бегство, кое му се спротивставува на езерото Комо со богато наследство, зачудувачки погледи и непобедлива вредност.“

Во статијата објавена на 18 април 2025 година, ТТВ ја претставува македонската туристичка гордост како „најдобро чуваната тајна на Европа“, наведувајќи ја како мирна и инспиративна алтернатива на пренатрупаните европски дестинации.

– „Ако барате спокој и подеднакво возбудливо искуство, патувајте 1.300 милји источно до скриениот скапоцен камен – Охридското Езеро“, пишува ТТВ.

Езерото, кое е двојно поголемо од Комо, со површина од над 138 квадратни милји и длабочина од 288 метри, се смета за најстарото езеро во Европа, старо околу три милиони години. Повеќе од 200 ендемични видови го прават рај за биолози и љубители на природата.

Според ТТВ, најдобар начин за истражување на езерото е од вода – со традиционални чамци, кајак или веслачки штици, од каде се откриваат драматичните крајбрежја. Посебно внимание ѝ се посветува на Охрид – град под заштита на УНЕСКО, преполн со историја, шарм и автентична архитектура.

Црквата „Свети Јован Канео“ од 13 век е наведена како една од највпечатливите знаменитости, а Музејот „Заливот на коските“ е препорачан за љубителите на историјата.

„Охрид, нарекуван и ‘Ерусалим на Балканот’, со своите 360 цркви и манастири нуди искуство што ретко се среќава на едно место“, додава медиумот.

Покрај природните и културните вредности, ТТВ ја истакнува и пристапноста на Охрид. Ресторани покрај езерото со вкусна традиционална храна како бурек, достапни хотели за само 30 фунти по ноќ, како и евтини летови од Лондон до Скопје преку Wizz Air за само 86 фунти, го прават Охрид идеален избор за буџетски ориентирани патници.

„Ако барате кристално чисти води, културно богатство и бегство без гужва – Охридското Езеро можеби е најдобро чуваната тајна во Европа“, порачуваат од британскиот медиум Travel and Tour World.