Од лето до зима за неколку дена: Снег ја покри и Грција

Првиот есенски снег ги покри врвовите и планинските области на Грција, оставајќи зад себе сцени кои изгледаат речиси нереално. Додека до неодамна туристите се капеа во топлото Егејско море и уживаа во сончевите денови, сега веќе можат да ја почувствуваат убавината на вистинската зима.

На социјалната мрежа X, страницата Forecast Weather Greece објави видео од снежната планина Олимп кое предизвика голем интерес кај љубителите на природата и зимските спортови.

Грција, која ова лето беше погодена од неколку топлотни бранови со температури над 40 степени, сега ја доживува спротивната страна на временските екстреми. Поради жештините, познатите атракции во Атина беа затворани во најжешките делови од денот, а работниците беа ослободени од работа заради ризик од топлотни удари.

Сега, само неколку дена подоцна, земјата е сведок на сосема поинаква слика – снежни врвови и зимска атмосфера уште пред календарскиот почеток на зимата.

Климатските промени сè повеќе го прават времето непредвидливо, а вакви нагли премини од лето во зима за само неколку дена стануваат сè почеста појава на Балканот.