Солун воведува блокатори за возила со странски таблички

Солунската општина започна со примена на построги мерки против непрописно паркирани возила, воведувајќи блокатори на тркала како средство за санкционирање, што важи и за сите возила со странски регистарски таблички, вклучувајќи ги и туристите од Македонија.

Со цел да се намали хаосот во урбаните делови на градот, особено за време на летната туристичка сезона, одлуката предвидува поставување блокатори на возила кои се затекнати на места резервирани за локални жители, лица со попреченост, или на зони за товарење и истовар.

„Немаме друг избор – паркирањето на десетици возила со странски таблички секојдневно го нарушува градскиот ред, а чести се случаите кога возачите свесно ги отстрануваат табличките за да избегнат казна“, соопшти општината.

Надлежните објаснуваат дека ако граѓаните забележат дека нивниот автомобил не може да се придвижи, најверојатно е поставен блокатор. За негово отстранување, потребно е да се јават на бројот на општинската полиција +30 2313 317930, да ја платат казната, по што овластените служби ќе го отстранат уредот.

Според заменик-градоначалникот задолжен за општинската полиција, Костас Циапакидис, мерката е реакција на систематско непочитување на прописите од страна на странски возачи:

„Имавме возила кои стоеле паркирани на забрането место и по две недели. Казните се кинеа и игнорираа. Блокаторите се ефикасно и неопходно решение.“

Контролите ќе се интензивираат, особено во најфреквентните туристички зони како што се трговскиот центар “Mediterranean Cosmos”, центарот на градот, и познатата солунска променадa.

Граѓаните – и локални и странски – се повикуваат на строго почитување на правилата за паркирање, за да се избегнат непријатности, дополнителни трошоци и непланирано губење време.