Коби Брајант и неговата ќерка Џиана загинаа во хеликоптерска несреќа

Легендарниот поранешен кошаркар во НБА, Коби Брајант, загина вчера во хеликоптерска несреќа во Калифорнија.

Според американски медиуми, се урнал приватниот хеликоптер на Брајант (41), а во леталото имало уште најмалку три други лица. Несреќата во близина на Лос Анџелес никој не ја преживеал, нагласуваат американските медиуми.

Трагичната вест ја објави сајтот TMZ, кој стигна до информации дека Коби патувал со најмалку три други лица и дека сите биле пронајдени мртви. Коби, кој е еден од најдобрите кошаркари на сите времиња, беше во брак со Ванеса Брајант и татко на четири девојчиња – Наталија, Џиана, Бјанка и Капри.

Брајант е роден 1978 година во Филаделфија, а целата кариера играше за Лос Анџелес Лејкерс од 1996 до 2016 година, освојувајќи пет титули во НБА.

Беше двапати најкорисен играч на финалето во НБА, еднаш МВП од регуларната сезона, 18 пати учествуваше во „Ол-стар“, победи на натпревар за забивање, двапати беше најдобар стрелец на лигата.