Скопје доби симбол на мирот: Индија подари биста на Махатма Ганди поставена во Музејот на Град Скопје

Во знак на пријателство, почит и заеднички хуманистички вредности, Република Индија му подари на Скопје биста на Махатма Ганди, која беше свечено откриена и поставена во Музејот на Град Скопје.

На церемонијата присуствуваа претседателката на Северна Македонија, Гордана Сиљановска-Давкова, и претседателката на Република Индија, Друпади Мурму, кои ја истакнаа важноста на делото на Ганди и неговото влијание врз светската историја.

Сиљановска-Давкова порача дека новата биста претставува симбол на долгогодишното пријателство меѓу Македонија и Индија, но и потсетник на вредностите што ги споделуваат двата народи – мирот, слободата, достоинството и почитта кон човекот.

„Махатма Ганди остави наследство кое ги надминува границите на една држава. Неговата филозофија на ненасилство, правда и мирен отпор инспирираше милиони луѓе ширум светот“, истакна македонската претседателка.

Таа нагласи дека идеите на Ганди за слободата и правото на народите сами да ја определуваат својата иднина имаат силна симболика и во македонското историско искуство, посочувајќи го мирното осамостојување на државата во 1991 година.

Ганди и Мајка Тереза – симболи на човечноста

Претседателката се осврна и на духовната поврзаност меѓу Махатма Ганди и Мајка Тереза, посочувајќи дека токму Скопје, родниот град на светицата, е вистинското место за бистата на лидерот кој го промени начинот на кој светот гледа на борбата за права и слобода.

Според неа, и Ганди и Мајка Тереза преку скромноста, посветеноста и грижата за најранливите оставија неизбришлив траг во современата историја.

„Нема посоодветен дом за бистата на таткото на современа Индија од родното место на Мајка Тереза, како траен симбол на вредностите што ги поврзуваат македонскиот и индискиот народ“, порача Сиљановска-Давкова.

Гандиевата порака за мир е важна и денес

Индиската претседателка Друпади Мурму истакна дека во време на глобални предизвици, конфликти и поделби, идеите на Ганди за дијалог, толеранција и мирен соживот остануваат исклучително значајни.

Таа порача дека иако Ганди му припаѓал на индискиот народ, неговата порака е универзална и му припаѓа на целото човештво.

„Неговото наследство покажува дека вистината и ненасилството не се слабост, туку силни средства за постигнување правда, слобода и достоинство“, изјави Мурму.

Скопје доби нов потсетник на вредностите на дијалогот

Градоначалникот на Град Скопје, Орце Ѓорѓиевски, оцени дека поставувањето на бистата претставува траен симбол кој ќе потсетува дека најголемите промени започнуваат со почитување на човекот, искрен дијалог и надминување на поделбите.

Пред свеченото откривање на бистата, двете претседателки ја посетија Спомен-куќата на Мајка Тереза, каде што оддадоа почит кон нејзиниот живот и дело.

Посетата беше посветена на вредностите што ги поврзуваат двете светски личности – милосрдието, солидарноста, ненасилството и грижата за човекот.