Денес се одбележуваат 112 години од смртта на Гоце Делчев

Во Македонија денеска се одбележуваат 112 години од смртта на македонскиот револуционер Гоце Делчев.

По тој повод државни и градски делегации ќе положат цвеќиња на неговиот гроб во црквата Св. Спас и на споменикот во Градскиот парк.

Делегација на Собранието на Република Македонија во состав Силвана Бонева, Љупчо Димовски и Роза Топузова Каревска во црквата „Свети Спас“ ќе положи цвеќе на гробот на Гоце Делчев. Цвеќиња ќе положи и официјална делегација од Град Скопје, предводена од градоначалникот Коце Трајановски.

Во македонското Собрание, пак, ќе биде доделена наградата „Гоце Делчев“ за особено значајни остварувања од интерес за Република Македонија во областа на науката.

Наградата ќе им биде врачена на авторите на трудовите „Толковен речник на македонскиот јазик“ од тимот д-р Елизабета Бандиловска-Ралповска, д-р Олгица Додевска-Михајловска, д-р Снежана Велковска, д-р Снежана Веновска-Антевска, д-р Елка Јачева-Улчар, д-р Виолета Николовска, д-р Фани Стефановска-Ристеска, м-р Катица Топлиска-Евроска и д-р Живко Цветановски, за трудот „Резултати за композија и неутрикс композиција“ од проф. д-р Билјана Јолевска-Тунеска и за „Говорот на Албанците од Скопска Црна Гора“ од проф. д-р Аслан Хамити.

Гоце Делчев (4 февруари 1872, с. Кукуш-4 мај 1903 с. Баница) е македонски револуционер и национален херој. Тој се смета за апостол, идеолог, организатор и водач на македонското револуционерно националноослободително движење кон крајот на 19. и почетокот на 20. век.

Загинал во предвечерието на Илинденското востание, на 4 мај 1903 година во селото Баница, Серско, во борби со османлиската војска која го опколила селото.

Неговите посмртни останки прво се чувале во Баница до 1917 година, кога се пренесени во Ксанти, а потоа во Софија. До 1923 година, ковчежето со коските се чувало во домот на Михаил Чаков. Посмртните останки на Делчев на 11 октомври 1946 година се пренесени во Скопје, во црквата „Свети Спас“.