Македонија под снег – еве каде има најмногу снежна покривка

Попова Шапка утрово осамна во вистинска зимска идила – со снежна покривка од 26 сантиметри и температура од –4 степени. Според податоците на УХМР, ова е најстудената точка во земјата денеска, а снег има и во други планински региони.

Во Маврови Анови се измерени 12 сантиметри снег, додека во Лазарополе висината достигна 16 сантиметри. Ѓуриште има шест сантиметри, а Дебар три.

Температурите се движат во негативни и ниски вредности: –2 степени во Маврово и Лазарополе, нула во Крушево, еден во Тетово, а само 3 степени се измерени во Скопје–Петровец, Зајчев Рид, Куманово, Велес и Битола. Најтопло е во Гевгелија со 5 степени.

Изминатите 24 часа донесоа обилни врнежи, при што најмногу дожд падна во Струмица – дури 52 литри на метар квадратен, веднаш потоа следуваат Гевгелија со 51 и Демир Капија со 50 литри.

Според прогнозата на УХМР, денот ќе продолжи со променливо облачно и студено време, со повремени врнежи од дожд, а на планините со снег. Ќе дува умерен до засилен северен ветер, а максималните температури ќе бидат меѓу 3 и 11 степени.

Во Скопје времето останува облачно и студено, претпладне со врнежи од дожд, а на повисоките делови и со снег. Засилен северен ветер ќе ја засили студената атмосфера, а максималната температура ќе се движи околу 7 степени.

Македонија доби мала зимска најава уште на почетокот на октомври – и тоа со вистинска снежна слика на планините.