Зимата пристигна порано од очекуваното – скопјани се разбудија со снег на Водно (ФОТО)

Скопје денес осамна под првиот снег за оваа сезона. Жителите на главниот град утрово имаа несекојдневна глетка – делови од Скопје се разбудија со бела прекривка, и тоа многу порано отколку што вообичаено започнува зимската сезона.

Најмногу снег има на повисоките делови, особено на Водно, каде што белилото го разубави пејзажот. Според информации од граѓаните, снежни врнежи се забележани и во околината на општините Бутел и Чучер Сандево.

Фотографии од раноутринските часови веднаш ги преплавија социјални мрежи – скопјани го споделуваат необичниот есенски снег, што во изминатите неколку години не е чест случај.

Според метеоролозите, ова е еден од најраните почетоци на снежната сезона во последниот период, што уште еднаш ја отвора темата за промените во климата и непредвидливите временски услови.