ВРЕМЕТО ДЕНЕС: Облачно со обилни врнежи од дожд

Времето денеска ќе биде облачно со обилни врнежи од дожд, особено во крајните западни и северни делови на земјава, каде на места се очекува да наврнат повеќе од 50 литри на метар квадратен воден талог. Некаде врнежите ќе бидат проследени со ретки грмежи.

Ќе дува умерен, повремено засилен ветер од југоисточен правец. На места брзината на ветерот ќе достигнува над 60 километри на час. Утринската температура ќе се движи од 11 до 15, а дневната од 17 до 20 степени.

Во Скопје ќе биде облачно со врнежи од дожд со променлив интензитет и со умерен повремено засилен ветер од југоисточен правец. Утринската температура ќе се спушти до 14, а дневната ќе се искачи до 18 степени.

Управата за хидрометеролошки работи утринава соопшти дека во текот на изминатата ноќ облачноста во Македонија се зголемила и оти врнежите започнале меѓу 3 и 4 часот по полноќ, а се интензивирале околу 5 часот особено во северозападниот дел на државата.

До 8:30 часот најмногу воден талог е наврнат во Пожаране 14 литри на метар квадратен, потоа во Тетово и Маврово 13, Ѓуриште 9, Скопје, Лазарополе и Дебар 8, Гевгелија, Куманово и Крушево 6, Штип, Струмица и Виница 5, Крива Паланка, Претор, Тполчани, Прилеп, Демир Капија и Дојран 3 и Берово 2 литри на метар квадратен. Најмалку дожд има наврнато во Охрид еден литар на метар квадратен.

Извесно преодно стабилизирање на времето се очекува в понеделник и во вторник, а во почетокот на втората половина на следната недела повторно се очекува променливо облачно време со повремени локали врнежи од дожд.