УХМР најавува пеколна недела – Македонија под нов топлотен бран

Во текот на наредните денови Македонија ќе биде зафатена од нов топлотен бран, со температури кои во одделни делови на земјата би можеле да се искачат до 39°C, предупредуваат од Управата за хидрометеоролошки работи (УХМР).

Министерството за здравство реагираше со итен апел до јавноста за строго почитување на препораките за заштита од високите температури, посочувајќи дека граѓаните се особено изложени на ризик во периодот од 8 до 13 август.

Надлежните институции препорачуваат престој во разладени простории, избегнување директно изложување на сонце од 11 до 17 часот, зголемен внес на течности, како и целосно откажување од алкохол и засладени пијалаци.

Во соопштението се потенцира потребата од заштита на најранливите категории – малите деца, постарите лица, хронично болните и бремените жени. Особено се советува носење лесна и светла облека, заштита на главата и очите, и одложување на физичка активност на отворено во најжешкиот дел од денот.

Доколку се појават симптоми како вртоглавица, забрзано чукање на срцето, гадење или главоболка, неопходно е веднаш да се побара лекарска помош.

Од Министерството истакнуваат дека состојбата се следи внимателно, и здравствените служби се подготвени да реагираат согласно реалните потреби и проценки.

Апелот до јавноста е јасен: сериозно сфатете ги предупредувањата и преземете мерки за лична и семејна безбедност.