Црвениот тепих од фестивалот во Кан се продава за едно евро по килограм

Црвениот тепих од скалите на зградата каде што се одржува Канскиот филмски фестивал се менуваше секој ден од 13 до 24 мај, сè додека траеше настанот, а сега се нуди на продажба по цена од едно евро за килограм.

Тон и пол црвен синтетички материјал, по кој годинава газеа многу ѕвезди од светската кинематографија, добива нов живот во Марсеј во рацете на стилисти, за потребите на театарските компании или модните ревии, пишува францускиот „Ле Фигаро“.

„Го продаваме како „едноставен, фин црвен филц тепих“, а не како „Кански тепих“, објасни за медиумите Жан Ре, координаторка на „Резерв дез Артс“, здружение кое рециклира отпад за креативни цели.

„Не ја продаваме оваа ткаенина за маркетиншки цели, бидејќи без оглед на сè, ќе се продава по иста цена. Целта е да се направи достапна за што е можно повеќе членови“, продолжи таа. „Ова се предмети кои не биле наменети за повторна употреба. Со нивното рециклирање, придонесуваме за намалување на влијанието на одредени настани врз животната средина, за што раководството на Фестивалот е многу свесно“, рече Ре.

„Од тепихот во Кан, правиме класични чанти, но и торби за шишиња вино, капи, футроли за очила – доста уникатни парчиња“, објасни Елса Рамуни-Јордикијан, клиентка на „Резерв дез Артс“ и секретарка на здружението „Les Nippones“, кое повеќе од четири години користи делови од познатиот тепих за рециклирање.