Италија воведува строги правила за инфлуенсерите – ќе се казнуваат до 250.000 евра!

Италијанските инфлуенсери и создавачи на содржина на социјални мрежи набрзо би можеле да бидат обврзани со истите правила како и традиционалните медиуми при објавување на содржина на интернет.

Италијанската агенција за комуникации (AGCOM) најави дека правилата, првично насочени кон инфлуенсери со повеќе од милион следбеници, ќе бидат воведени со цел подобра регулација на комерцијалната комуникација и заштита на основните права на луѓето, малолетниците и спортските вредности.

Инфлуенсерите ќе треба да ја означат јасно својата соработка со брендови и да ги истакнат комерцијалните интереси.

Во случај на пласирање на производи, ќе бидат задолжени да вметнат предупредување за рекламната природа на содржината. За непочитување на правилата, предвидени се високи казни, посебно за оние со истакнато влијание.

AGCOM истакна дека новите мерки имаат за цел и заштита на децата, вклучувајќи строги казни за инфлуенсерите кои не ги означуваат правилно соработките и комерцијалните интереси, со глоби до 250.000 евра.

Оваа одлука следи по скандалот со италијанската инфлуенсерка Кјара Ферањи, која беше казнета со повеќе од милион евра поради невистинско тврдење дека продажбата на божиќна торта би помогнала во финансирањето на детската болница во Торино.