Од денес без СМС-код: Онлајн плаќањата во Македонија со нов, построг безбедносен режим

Од 1 март стапуваат на сила нови правила за онлајн-плаќање, со кои се воведува задолжителна засилена автентикација при секоја трансакција направена со платежна картичка преку интернет.

Наместо досегашната потврда преку СМС-код, корисниците отсега ќе добиваат push-известување во мобилната банкарска апликација, каде што ќе треба активно да ја одобрат трансакцијата. Потврдата ќе се врши со ПИН за апликацијата, отпечаток од прст или препознавање лице.

Без оваа дополнителна проверка, плаќањето нема да може да се реализира – дури и во случај некој да ги поседува сите податоци од картичката.

Што значи ова за граѓаните?

Новата мерка има за цел да ја зголеми заштитата од злоупотреби и интернет-измами, особено при плаќања без физичко присуство. Со воведувањето на повеќекратна проверка на идентитетот, ризикот од неовластени трансакции значително се намалува.

Обврската произлегува од Законот за платежните услуги и платните системи, а се однесува на сите даватели на платежни услуги во земјата. Засилената автентикација веќе се применува при:

• увид во платежни сметки преку електронско банкарство

• плаќања со картичка на физички продажни места

• извршување платни налози преку мобилно банкарство

Со новите измени, системот сега целосно се применува и за онлајн-купувањата.

Финансиските институции апелираат граѓаните редовно да ги ажурираат своите мобилни апликации и да ги активираат безбедносните опции за да избегнат евентуални проблеми при плаќањата.