Крадел со една цел – да заврши во затвор: Неверојатно признание на Македонец во Швајцарија

Дваесет и деветгодишен државјанин на Македонија доби затворска казна од пет години по серија разбојништва и имотни деликти извршени во 2024 година на територија на Швајцарија. Пресудата ја донел надлежен окружен суд во кантонот Аргау, а покрај затворот му се изречени и високи финансиски обврски и долгорочна забрана за влез во земјата.

Според судските наоди, обвинетиот најпрво ограбил локален маркет во градот Волен, при што ѝ се заканил на вработена користејќи воздушен пиштол и одзел околу 1.500 швајцарски франци. Подоцна, во одвоени инциденти, извршил кражби и во златарница во Аарау – прво земал пари од касата, а потоа, по неколку дена, со чекан оштетил витрина и одзел накит вреден десетици илјади франци.

По пријава од граѓани, полицијата го привела по кратка потрага. Случајот бил процесиран во забрзана постапка, при што обвинетиот признал и други дела: обиди за провали во трговски објекти, оштетување имот, упатување закани и управување велосипед под дејство на алкохол.

Она што го издвојува овој случај е мотивот што самиот обвинет го навел пред судот. Тој изјавил дека во тој период се соочувал со сериозна зависност од алкохол и дека свесно сакал да заврши во затвор, верувајќи дека тоа ќе му помогне да се одвикне. На прашањето зошто не побарал стручна помош во специјализирана установа, одговорил дека неговата намера била исклучиво да биде лишен од слобода.

Судот оценил дека обвинетиот не покажал вистинско каење, ниту емпатија кон жртвите. Во образложението на пресудата било посочено дека сторителот бил фокусиран единствено на сопствената цел, без да ги земе предвид последиците врз другите.

Покрај затворската казна, му е наложено да плати околу 79.000 швајцарски франци на име штета и судски трошоци, а по издржувањето на казната ќе му биде забранет влез во Швајцарија во наредните 10 години.