iPhone 17 Pro забележан на улиците во САД: Камерите откриваат голема промена

На интернет се појави првата фотографија за која се верува дека прикажува прототип на новиот iPhone 17 Pro, што веднаш предизвика големо внимание кај љубителите на технологијата. Иако Apple очигледно се обидел да го прикрие уредот со заштитна маска, променетиот изглед на задниот модул со камери откри повеќе отколку што било предвидено.

Фотографиите, кои за првпат ги објави корисникот @Skyfops на социјалната мрежа X (поранешен Twitter), прикажуваат два iPhone уреди – еден што личи на сегашниот iPhone 16 Pro, и друг кој според поставеноста на компонентите се смета дека е iPhone 17 Pro. Снимките наводно се направени во Лос Анџелес, во близина на кампусот на Apple, што дополнително ги зајакнува сомнежите дека се работи за интерен тест на новиот модел.

Клучната промена што се забележува е во распоредот на LiDAR сензорот и блицот, кои се преместени на десната страна од модулот. Овој дизајн е во согласност со претходни неофицијални информации за следната генерација на iPhone уреди, каде задниот модул ќе зафаќа поголем дел од горниот капак, со што се очекува подобро просторно решение за напредните камери.

Објавата брзо стана вирална и доби повеќе од 680.000 прегледи, а нејзината веродостојност дополнително ја потврди и технолошкиот новинар Марк Гурман од Bloomberg, кој е познат по точни предвидувања за Apple производи.

Според технолошките медиуми, iPhone 17 Pro и 17 Pro Max ќе добијат и нови материјали за задната површина, кои ќе понудат поинаков визуелен и тактилен доживеј. Освен тоа, се очекуваат и нови, поинтензивни бои, од кои највпечатлива ќе биде портокаловата нијанса, со цел уредот да се истакне во сè поголемата понуда на смартфони со сличен изглед.

Apple традиционално не ги коментира ваквите протекувања, но времето до официјалното претставување станува сè покусо, па ова може да биде само почеток на низата откритија за следната генерација на iPhone.