Скандал во AI светот: OpenAI го обвинува DeepSeek за кражба на моделите

OpenAI тврди дека кинескиот стартап DeepSeek користел негови модели за да го обучи својот конкурентен систем, што претставува прекршување на условите за користење.

Според Financial Times, OpenAI открил докази за „дестилација“, техника со која помали модели се обучуваат со помош на излезите од поголеми и поспособни модели. Иако оваа практика е вообичаена во индустријата, проблемот, според OpenAI, настанува кога се користи за развој на конкурентен производ.

Microsoft и OpenAI блокирале сметки за кои се верува дека припаѓаат на DeepSeek и ги користеле нивните API услуги. Компанијата одби да даде дополнителни детали за истрагата.

Објавувањето на моделот DeepSeek R1 предизвика реакции на пазарот, а акциите на Nvidia паднаа за 17 отсто поради стравувања дека намалената потреба за скап AI хардвер ќе влијае на инвестициските трендови.

DeepSeek не одговори на барањата за коментар, а OpenAI нагласи дека ќе продолжи со мерки за заштита на својата интелектуална сопственост, вклучително и соработка со американската влада.