Доделувањето на „Еми“ наградите e одложено поради штрајкот во Холивуд

Церемонијата на доделување на најпрестижните американски телевизиски награди „Еми“ е одложена за четири месеци и наместо во септември ќе се одржи во јануари, бидејќи штрајкот на актерите и сценаристите го парализира Холивуд.

Церемонијата, која е еквивалентна на Оскарите за телевизија, првично требаше да се одржи на 18 септември, а ќе се одржи во средината на јануари 2024 година, објавија во заедничка изјава организаторите, телевизијата Фокс и Телевизиската академија.

„Задоволство ни е да објавиме дека 75-тото доделување на наградите Еми ќе се емитува во понеделник, 15 јануари 2024 година“, изјави портпаролот на американската телевизија Фокс.

Тоа е засега најголемата церемонија од светот на филмот и телевизијата, кој е погоденa од двоен штрајк на сценаристите и актерите, каков што не е забележан во Холивуд од 1960-тите.

Последен пат „Еми“ наградите беа одложени во 2001 година, во контекст на терористичките напади врз САД на 11 септември.

По повеќе од 100 дена штрајк, не е пронајден договор меѓу претставниците на сценаристите и студијата за подобро плаќање на сценаристите со преземање дел од профитот од стриминг или за ограничување на вештачката интелигенција во индустријата. Во јули, актерите се приклучија на протестите на сценаристите.