МАКФЕСТ 2021: Победник е дебитантот Александар Тодоровски со песната „Под исто небо“
Александар Тодоровски со песната ,,Под исто небо“ е победник на овогодинешното 36. издание на „Макфест“.
– Не ми се верува. Им благодарам на сите. Со огромна почит кон фестивалот, соништата се остваруваат – порача победникот.
„Под исто небо“ е песната која освои најмногу гласови и од публиката и од стручното жиро. Музиката и текстот се на Ристо Самарџиев, а аранжманот е на Давор Јордановски.
Втората награда отиде во рацете на Мартинијан Кириловски , а третата награда ја освои младата штипјанка Марија Данева.
Помеѓу натпреварувачите на Макфест 2021 беа и Ѓоко Танески, Роберт Билбилов, Ај Кју, Полина Тасева, Лара Иванова, Филип Пешевски.
Макфест оваа година по вторпат се одржа на отворено, во Аквабела Ресорт, овојпат во поразлична форма од изминатите години, односно имаше две вечери, првата – дебитантска вечер и втората – финална вечер, во која влегоа 5 победници од првата вечер.
Водители на фестивалот беа Мирослав Кацаров и Ведрана Ѓорѓевиќ. Макфест 2021 и годинава беше финансиски помогнат од Министерството за култура и Општина Штип, кој е и организатор на фестивалот.
