Регионалната сензација доаѓа во Скопје: Јаков Јозиновиќ со концерт на 9 април

Хрватскиот пејач Јаков Јозиновиќ официјално го најави својот прв концерт во Македонија. Настанот ќе се одржи на 9 април во арената Јане Сандански во Скопје, како дел од неговата регионална турнеја „Ја за чуда летим“.

На средбата со медиумите, Јозиновиќ зборуваше за големиот интерес што ја следи турнејата, потенцирајќи дека концертите низ регионот се распродаваат со рекордно темпо. Во Белград имаше повеќе последователни распродадени вечери, а значаен интерес е забележан и во Љубљана, Загреб и други градови.

За скопската публика најавува вечер со засилена продукција, внимателно осмислена сценографија и специјални музички изненадувања. Дел од сет-листата, како што откри, ќе биде прилагоден специјално за македонската публика.

Јозиновиќ се прослави по учеството во шоуто Суперталент, а во меѓувреме изгради силна база на фанови со милионски прегледи и нови авторски песни како „Поље ружа“ и „Ја волим“.

Билетите за концертот се веќе пуштени во продажба преку МкТикетс.