Пред концертот во Скопје, Лозано изненади со нова балада – слушнете ја „Среќен пат“ (ВИДЕО)

Само неколку дена пред големиот концерт во Скопје, македонскиот пејач Влатко Лозаноски – Лозано ја објави својата најнова песна со наслов „Среќен пат“.

Новата нумера е емотивна балада, препознатлива по силната интерпретација и вокална експресија што со години го издвојуваат Лозано на домашната сцена. Песната носи интимна приказна за разделба и надеж, а зад неа стои внимателно избран авторски тим. Текстот го напиша Луна Ристиќ, музиката е дело на Гоце Симоноски, додека аранжманот го изработи Лазар Цветкоски.

Видео што ја засилува емоцијата

Паралелно со аудио-изданието беше промовиран и видеоспот, режиран од Гордан Божиновски и Верица Донев Божиновска. Главните улоги ги толкуваат актерите Катерина Јовановиќ и Метин Ибрахим, кои преку визуелната приказна ја надополнуваат атмосферата на песната.

Лозано накратко изјави дека „Среќен пат“ има посебно значење за него и најави дека наскоро публиката може да очекува уште едно музичко изненадување – нова соработка со колеги од естрадата.

Во исчекување на 7 март

Објавата на песната доаѓа во пресрет на солистичкиот концерт што ќе се одржи на 7 март во арената Борис Трајковски во Скопје. Организаторите најавуваат вечер со богата продукција и репертоар составен од неговите најголеми хитови, но и нови изведби.

Билетите сè уште се достапни во продажба.