Ѕвездите од „Friends“ се огласија по смртта на Метју Пери

Ѕвездите на серијата „Friends“ („Пријатели“) објавија заедничко соопштение по смртта на нивниот колега Метју Пери.

Џенифер Анистон, Мет Лебланк, Дејвид Швимер, Лиза Кудроу и Кортни Кокс дадоа заедничка изјава за магазинот „People“.

„Комплетно сме скршени од загубата на Метју. Ние не бевме само колеги, ние сме семејство. Има толку многу нешта да се кажат, но сега ни е потребен момент да тагуваме и да ја процесираме оваа преголема загуба. Кога ќе дојде време ќе зборуваме повеќе, кога ќе можеме. Засега, нашите мисли и нашата љубов се со семејството на Метју, неговите пријатели и сите оние низ светот кои го сакаа“ – стои во заедничкото соопштение.

View this post on Instagram

A post shared by People Magazine (@people)

Претходно, ко-креаторите на хит-серијата Марта Кауфман и Дејвид Крејн и извршниот продуцент Кевин Брајт се огласија со заедничка изјава.

„Шокирани сме и многу тажни поради смртта на нашиот сакан пријател Метју. Се уште изгледа невозможно. Можеме само да кажеме дека се чувствуваме благословени што го имавме како дел од нашите животи. Тој беше брилијантен талент. Клише е да се каже дека актерот ја прави улогата своја, но во случајот на Метју нема повистинити зборови. Од денот кога за првпат го слушнавме како ја отелотворува улогата на Чендлер Бинг немаше никој друг актер за нас. Секогаш ќе ја негуваме радоста, светлината и заслепувачката интелигенција што ја носеше во секој момент. Секогаш беше најсмешната личност во собатаи во животот. Секогаш беше најсмешната личност во собата. Целата наша љубов ја испраќаме до неговото семејство и пријателите“ – пишува во нивното соопштение.

View this post on Instagram

A post shared by Friends (@friends)

За потсетување, Метју Пери беше пронајден мртов во џакузито во неговиот дом во саботата. Имаше 54 години. Истрагата за смртта се уште е во тек. Надлежните потврдија дека обдукцијата е завршена и се чека токсиколошки извештај. Резултатите од тој извештај се очекуваат за неколку недели.

Надвор од зградата на улицата Бедфорд 90, која во серијата ја претставуваше зградата во која живееја ликовите од „Пријатели“, обожавателите оставаат цвеќиња, фотографии и пораки за покојниот актер.