Шоубиз
Тејлор Свифт влезе во клубот на милијардери благодарение на својата турнеја
Тејлор Свифт постигна уште еден голем успех во својата богата кариера – стана милијардерка, покажува анализата на Bloomberg.
Издавачката куќа, која го води индексот на милијардери на Блумберг, соопшти дека нејзината вкупна нето вредност сега изнесува 1,1 милијарда долари, благодарение на рекордната турнеја „Eras Tour“ која ова лето помогна да се зајакне и американската економија. Блумберг тврди дека Свифт е една од ретките ѕвезди кои достигнале статус на милијардер само врз основа на својата музика и концерти.
Покрај стадионите, Свифт доминираше и во кината. Во првиот викенд, нејзиниот концертен филм „Taylor Swift: The Eras Tour“ заработи околу 96 милиони долари на кино благајните во Соединетите Американски Држави и Канада, што го прави концертен филм со најголема заработка на домашниот пазар во неговиот премиерен викенд, според AMC.
Турнејата би можела да заработи 2,2 милијарди долари само од продажба на билети во Северна Америка, според истражувањето во август дадено за CNN од истражувачката компанија QuestionPro. Таа сума претставува продажба на билети за концертите во САД досега, како и вториот дел од северноамериканската турнеја што продолжува следната година, што би ја направило турнејата со најголема заработка досега.
Свифт дури ја зголеми продажбата на билети за натпреварите во НФЛ. Имено, веста дека Свифт ќе дојде на натпреварот на 1 октомври за да го гледа своето ново момче Тревис Келси, ѕвездата на Канзас Сити Чифс, доведе до зголемување на цените на билетите за повеќе од 40 отсто – од 83 на 119 долари.
Пејачката стана културен феномен, што дополнително го зголеми нејзиното економско влијание. Во градовите каде што настапуваше Свифт нагло се зголеми бројот на патници во јавниот превоз, како и пополнетоста на хотелите.
Свифт, исто така, денес објави нов албум, „1989 (Taylor’s Version)“, римејк од албумот „1989“, кој заработи вкупно 10 номинации за Греми кога беше објавен. Тејлор повторно ги сними сите 16 песни од нејзиниот иконски албум и додаде уште пет нови песни, со што создаде нова верзија на плочата што ја донесе пејачката до врвот на светската слава.
Пејачката објави во 2019 година дека планира повторно да ги сними своите први шест студиски албуми откако нејзината поранешна издавачка куќа ги продаде нејзините мастер снимки. Оттогаш, таа ги издаде новите верзии за албумите „Red“, „Speak Now“ и „Fearless“, а денеска и за „1989“.
