„Безбеден град“ ќе казнува и паркинг прекршоци – како ќе се контролира сообраќајот и што се менува?

До крајот на април, во Собранието ќе бидат поднесени законските измени поврзани со безбедноста во сообраќајот, а новиот систем „Безбеден град“ треба да стапи во сила на 1 јануари 2026 година. Министерот за внатрешни работи, Панче Тошковски, истакна дека за активирање на системот ќе биде неопходна измена на најмалку пет закони.

Но, како ќе функционира?

Секоја регистарска табличка ќе биде поврзана со сопственикот на возилото, а во случај на прекршок, системот автоматски ќе испраќа известување со парична казна. Прекршокот ќе биде документиран со фотографија, а извештајот ќе пристигне преку СМС порака или е-пошта.

Како ќе се плаќаат казните?

Во известувањето ќе има линк до извештајот со налог за плаќање и фотографски доказ. Ако сопственикот не го отвори линкот во рок од осум дена, се смета дека е уредно доставено, а започнува периодот за:

🔹 Плаќање на половина од износот (во првите осум дена)
🔹 Поднесување барање за судска постапка
🔹 Автоматско проследување кон извршна наплата, ако нема реакција

Ако возачот го признае прекршокот и плати во осумдневен рок, ќе плати само половина од казната. Доколку не ја плати навреме, ќе мора да ја плати во целост. Ако не ја прифати одговорноста, има право да поднесе барање за судска постапка.

Построги казни за повторени прекршоци

За оние што често ги кршат правилата, судот ќе има можност да изрече мерка престанок на важноста на возачката дозвола. Ова ќе се применува ако возачот добие две забрани за возење во рок од четири години.

Одредени прекршоци ќе добијат статус на кривични дела, меѓу кои:

✔ Пречекорување на брзината за повеќе од 50 км/ч
✔ Возење под дејство на алкохол или наркотици
✔ Возење во погрешна насока на булевар или автопат
✔ Управување возило без возачка дозвола

За несовесно возење, ќе се воведат и затворски казни, парични санкции и забрана за управување возило.

Нови „паметни“ камери и контрола на паркирањето

Покрај сообраќајните камери, нови „паметни“ камери во полициски возила ќе следат и неправилно паркирани возила. Во тест-периодот, кој ќе трае неколку месеци, граѓаните ќе добиваат само известувања за направените прекршоци.

Според министерот Тошковски, овој систем е неопходен бидејќи засилените контроли покажале дека само во Скопје, за 10 дена, биле регистрирани над 4.000 прекршоци.

Во тек се законските измени за безбедност на патиштата, прекршоци, возила, кривичниот законик и извршување на санкциите, а првичната верзија на законските измени се очекува да биде подготвена до крајот на март, за да влезе во собраниска процедура во април.