ИСТРАЖУВАЊЕ: Како загадениот воздух ја менува нашата психа, концентрација и расудување?

Дури и краткотрајната изложеност на загаден воздух може значително да ја намали способноста за концентрација и расудување, покажува ново истражување спроведено во Велика Британија.

Според The Guardian, загадувањето влијае на когнитивните функции и ја зголемува расеаноста во секојдневниот живот.

Како загадениот воздух влијае на мозокот?

Истражувањето, објавено во престижното научно списание Nature Communications, докажува дека високо ниво на ПМ-честички има директно влијание врз селективното внимание и способноста за препознавање емоции. Испитаниците имале потешкотии со задржување на фокусот, биле подложни на одвлекување на вниманието, а воедно покажале намалена способност за препознавање емоции кај другите луѓе.

👉 „Испитаниците изложени на загаден воздух покажаа значително послаб фокус. Ова може да влијае на нивните секојдневни одлуки, како што е импулсивното купување во супермаркет – бидејќи не можат да се концентрираат на своите цели,“ објаснува д-р Томас Фајерти од Универзитетот во Бирмингем, еден од водечките истражувачи.

Загадувањето – глобален здравствен проблем

Според Светската здравствена организација, загадувањето на воздухот е еден од водечките фактори на ризик за јавното здравје. Се проценува дека загадениот воздух годишно предизвикува околу 4,2 милиони предвремени смртни случаи низ светот.

Дополнително, истражувањето открило дека загадениот воздух може да биде поврзан со зголемена агресивност и насилство, особено во урбаните средини.

👉 „Испитаниците полошо ги препознаваа изразите на лицата – не можеа лесно да разликуваат дали некој е среќен или исплашен. Ова може да има сериозни последици врз општествената интеракција,“ вели Фајерти.

Што понатаму?

Истражувачите нагласуваат дека овие резултати може да помогнат во подобрување на политиките за заштита на јавноста од загадување. Големите извори на загадување, како што се согорувањето дрва, готварските апарати и издувните гасови, се предмет на понатамошни анализи.

👉 „Ако утврдиме дека одредени производи за чистење значително придонесуваат за загадувањето, тогаш може да се работи на промени во политиките за нивно регулирање,“ додава Фајерти.

Наодите од оваа студија ја потенцираат потребата од поефикасни стратегии за намалување на загаденоста, не само преку мерење на загадувањето, туку и преку решавање на самите извори на проблемот.