Општина Центар им посака топло добредојде на околу 600 првачиња
Општина Центар им посака топло добредојде на околу 600 првачиња кои денеска првпат седнаа во училишните клупи.
Таму ги дочекаа пораки за многу успех и добро здравје во текот на целата учебна година, како и пакетче со училиштен прибор и Бонтон за деца за добро однесување на училиште и во домот.
Целта на оваа активност е првоодделенците да го почувствуваат училиштето како свој втор дом, во кој ќе научат многу нови работи, но и ќе стекнат нови другари.
„Илустрираниот бонтон содржи повеќе совети за тоа како треба да се однесуваат со соучениците, како да се грижат за инвентарот, а годинава, со оглед на ситуацијата во која ќе се одвива наставата, вметнати се и содржини за правилно миење раце и одржување хигиена додека се во училиште. На сите првачиња, но и на останатите ученици им посакувам среќен почеток на учебната година, да бидат трпеливи и да ги почитуваат здравствените, со цел со заеднички сили да ја надминеме целата ситуација “, вели Саша Богдановиќ, градоначалник на општина Центар.
Ова бонтон издание е креирано специјално за деца на оваа возраст од страна на Центарот за визуелна комуникација Ефектива, додека целокупниот проект се реализираше со поддршка на брендот Алвоген ОРС – производ за брз и ефикасен надомест на течности и електролити.
Проектот „Среќно прваче“ прерасна во традиција, со оглед на тоа што трета година по ред се реализира во сите осум основни училишта на територијата на општина Центар.
