Казни за фалсификување и препродавање на билети за Суперкупот

Собранието на Република Македонија попладнево едногласно ги донесе предложените измени и дополнувања на Кривичниот законик со кој се предвидуваат воведување санкции за фалсификување и нелегално продавање билети за Супер купот на 8 август годинава во Скопје.

Законот беше предложен по скратена постапка од страна на четири пратенички групи.

Како што образложи еден од потписниците на предлогот Томислав Тунтев, измените и дополнувањата се заради усогласување со правилата за успешна организација на овој настан, а за да се спречи фалсификување и нелегална продажба на билетите, а поради тоа што досега не било законски утврдено.

Илија Димовски, од ВМРО-ДПМНЕ, кој е еден од потписниците на предлогот, рече дека ќе ги поддржат измените и истакна дека секој предлог што е корисен ќе биде поддржан од опозицијата, а кон се она што е штетно ќе имаат, како што рече, поинаков однос.

Владимир Ѓорчев од ВМРО-ДПМНЕ посочи дека овој предлог се однесува на афирмативен и позитивен повод за кој долго ќе се зборува.

– Овие измени ги правиме на барање на УЕФА. Ги бараме за да ги усогласиме нашите закони со земји како Англија, Германија, Франција…, рече Ѓорчев.