Облачно и ветровито со локален дожд – од утре интензивни врнежи од снег и заладување!

Времето во Македонија ќе биде променливо облачно со локални врнежи од дожд, особено попладне и кон крајот на денот. Во западните делови и на повисоките планини врнежите ќе бидат од снег. Ќе дува умерен до засилен јужен ветер кој ќе достигнува брзина и над 70 километри на час.

Утринската температура ќе се движи од минус три до четири, а дневната од осум до 14 степени.

Во Скопје ќе биде променливо облачно, попладне и во вечерните часови со повремен дожд. Преку денот ќе дува умерен до засилен југоисточен ветер. Утринската температура ќе се спушти до нула, а дневната ќе се искачи до 13 степени.

Во сабота ќе има заладување и поинтензивни врнежи кои во текот на денот, почнувајќи од север ќе преминуваат во снег. До недела наутро насекаде ќе се формира снежна покривка, најмногу на планините во западните делови каде што ќе достигне и над 50 сантиметри нов снег. На повеќето пониски места снежната покривка ќе изнесува од 10 до 20 сантиметри.

В недела во текот на денот врнежите ќе престануваат. За време на викендот и во понеделник ќе дува и засилен северен ветер.