Почина Ферус Мустафов

Синоќа, по кратко боледување, во ГОБ „8 Септември“ почина легендата на ромската музика Ферус Мустафов.

Познатиот музичар саксофонист на 26 април имал мозочен удар поради што веднаш бил хоспитализиран во болницата 8 септември.

Директорот на болницата Христијан Костов за порталот „Макфакс“ изјави дека лекарите дале се од себе за да му помогнат.

-Беше примен на 26 април со масивен мозочен удар. Беше во кома и беше ставен на респиратор веднаш по приемот. Се разбуди по една недела, му го тргнавме респираторот, му направивме трахеостома за да може да диши самостојно и да се храни на уста, но имаше и други коморбидитети кои ја комплицираа состојбата. Имаше висок шеќер, хроничен миокардит, проблеми со бубрезите, последната недела му правевме и дијализа. Последните денови повторно беше во кома. Лежеше на интензивна нега на неврологија. Сторивме се што можевме за да го кренеме, но ударот беше многу силен и направи многу оштетувања. Почина ноќеска, половина час по полноќ – вели директорот Костов.

Неговите пријатели и почитувачи веќе се простуваат од музичката легенда на социјалните мрежи.

Ферус Мустафов е роден во Штип во 1950 година, во ромско семејство на музичари. Неговата професионална кариера започнала на 17- годишна возраст, додека студирал виолина и кларинет во локална музичка академија. Ја напушта академијата откако на покана од бенд предводен од Тома Чрчев, оди на турнеја, а успехот на турнејата го натерало да се откаже од академското учење за да стане работен музичар.

Во неговата богата музичка кариера има настапувано во голем број земји во светот, а снимил и десетина албуми, главно со инструментални композиции.

Ферус ќе биде погребан на гробиштата во Штип, согласно неговата желба.