Пуштена во употреба катната гража „Тодор Александров“

Премиерот Никола Груевски денеска ја пушти и официјално новата катна гаража „Тодор Александров“ во центарот на Скопје и им го честитка на големиот број присутни Денот на независноста на Македонија.

Можноста да го празнуваме овој голем празник, како и можноста да живееме и твориме во слободна, суверена и независна држава, нагласи тој, е токму благодарение на големите дела кои што ни ги оставиле претходните генерации. Што ќе оставиме ние за следните генерации, подвлече, зависи од нас.

– Токму затоа, преку празнување на ваквите големи празници, во изминатите неколку години воведовме пракса симболично да ги означуваме и делата кои ги остава оваа наша генерација. Нашите дела се наши честитки до граѓаните во вид на фабрики, нови работни места, патишта, булевари, водоводи, училишта, катни гаражи, музеи, театри, болници и многу други дела кои сме ги ветиле, истакна премиерот Груевски.

Катната гаража со над 600 нови паркинг места, потенцира Груевски, со својот облик е дел од мозаикот наречен модерно и функционално Скопје.

– Во изминатите неколку години се изгради обиколчницата на Скопје, се изградија повеќе кружни токови, се проширија најбитните улици и булевари во градот, а во делот на катните гаражи, ова е 10 – та катна гаража која се пушта во Скопје. Пред неколку години немаше ниту една катна гаража, а денес има 10 и уште неколку други се во фаза на градба. Дел од нив ги изградивме ние како Влада, а дел ги изгради градот Скопје, дел од општините во Скопје, а дел ги изградија приватни инвеститори, рече Груевски. Додаде оти тоа е нашиот влог во она што се нарекува функционален град, град во кој ќе има добар и организиран проток на возила и доволно паркинг места.

Градоначалникот на Град Скопје Коце Трајановски во денешното обраќање по овој повод информира дека паркингот е висок 23  метри, бруто развиена површина од 29.183 метри квадратни и приземје, седум ката над земја и две нивоа под земја, а обезбедува и паркинг за 120 велосипеди.

Со новата катна гража „Тодор Александров“ ќе стопанисува ЈП „Градски паркинг“, а паркирањето ќе чини 30 денари за час.