Доналд Трамп ќе присуствува на Супер Боул

Доналд Трамп ќе присуствува на Супер Боул во недела, со што ќе стане првиот актуелен американски претседател кој присуствувал на финалето на плејофот на НФЛ како гледач, потврди Белата куќа.

Американскиот лидер во недела ќе присуствува на финалето на плејофот на професионалната американска фудбалска лига во Њу Орлеанс меѓу Канзас Сити Чифс и Филаделфија Иглс, изјави претставник на Белата куќа, потврдувајќи ги информациите од американските медиуми.

Доналд Трамп ќе биде првиот актуелен претседател кој ќе присуствува на најголемиот годишен спортски настан во Соединетите држави, кој се одржува секоја година на крајот од НФЛ сезоната. Медиумите потсетуваат дека Трамп често имал тежок однос со НФЛ.

Во 2017 година, тој го доведе во прашање патриотизмот на играчите кои клекнаа за време на американската химна за да привлечат внимание на прашањата за расна неправда. Во тоа време, неговите критики предизвикаа бран протести меѓу играчите.

Безбедноста за овогодинешниот Супер Боул веќе беше засилена како одговор на смртоносниот напад во Њу Орлеанс на 1 јануари, во кој загинаа 14 лица, десетици други беа повредени. Финалниот натпревар доаѓа во Њу Орлеанс за прв пат од 2013 година – и помалку од шест недели откако Шамсуд-Дин Џабар (42) со возило влета во луѓе во преполниот дел од иконскиот француски кварт во градот.