Римската фонтана Ди Треви што „заработува“ милиони: Каде одат сите тие пари?

Римската фонтана Ди Треви, позната по својата импресивна барокна архитектура и романтичната атмосфера, не е само едно од најпосетените места во Италија, туку и своевидна “машина за собирање пари”. Илјадници туристи секојдневно ја посетуваат со надеж дека една паричка ќе им донесе среќа и повторно враќање во Вечниот град.

Она што ја прави оваа локација уште повпечатлива е вредноста на желбите – дневно во водите на фонтаната завршуваат над 3.000 евра во ситни пари. Годишно, таа бројка достигнува помеѓу 1 и 1,5 милиони евра. Но, парите не завршуваат во џебовите на градските власти – од 2001 година, сите средства се насочени кон католички хуманитарен фонд, кој ги користи за обезбедување храна и социјална помош ширум светот.

По затворањето на фонтаната секоја вечер, градските служби ја празнат и ги собираат фрлените монети. Оваа рутина се повторува секој ден, а туристите и понатаму фрлаат со надеж.

Фонтаната, дизајнирана од Никола Салви и завршена од Џузепе Пањини во 1762 година, чинела околу 17.647 скуди – што денес би изнесувало од половина милион до два милиони долари, во зависност од вредноста на тогашното сребро и злато.

Голема реконструкција беше извршена во 2014 година, благодарение на модната куќа Fendi, која донираше повеќе од 2 милиони евра. Дополнителни 327.000 евра беа потрошени за одржување во изминатата година, со цел да се зачува ова културно богатство на Рим.

Според легендата, фрлање паричка со десна рака преку левото рамо носи не само исполнета желба, туку и сигурно враќање во Рим. Таа традиција е инспирација за многу филмови и љубовни приказни, што дополнително ја зголемува нејзината привлечност.