Барселона воведува повисок туристички данок: За секое ноќевање ќе се плаќа дополнително 15 евра

Барселона, една од најпопуларните европски туристички дестинации, подготвува зголемување на туристичкиот данок, што ќе ги засили трошоците за престој во градот. Со гласовите на мнозинството во градскиот совет, донесена е одлука за удвојување на оваа доплата до крајот на декадата.

Мерката предвидува секоја година да се додава по едно евро на постоечкиот данок, кој моментално изнесува четири евра. Целта е до 2029 година туристичкиот надомест да достигне осум евра. Дополнително, Каталонскиот регионален данок, кој се применува покрај градскиот, исто така ќе се зголеми, особено за престој во луксузни сместувања, што вкупно може да резултира со цена до 15 евра по ноќ.

Од локалната самоуправа велат дека парите собрани од даноците ќе се насочат кон подобрување на инфраструктурата, јавниот превоз, безбедноста и климатските проекти. Според нив, идејата не е да се обесхрабри туризмот, туку да се создаде одржлив систем кој нема да го оптоварува секојдневието на жителите.

Одлуката беше поддржана од левичарските партии, додека десничарските партии, како Вокс и Народната партија, гласале против. Тие сметаат дека мерката ќе го одврати туризмот и ќе испрати негативна порака до потенцијалните посетители.

Иако засега мерката е одобрена на локално ниво, конечната примена ќе зависи од измените во регионалната законска рамка, кои треба да бидат потврдени наесен.

Градските власти остануваат на ставот дека управувањето со туризмот е неопходно за зачувување на квалитетот на животот во Барселона и за рамноправна распределба на трошоците меѓу туристите и локалните жители.