Туристичка такса за еднодневни посетители: Нов тренд на грчките острови?

Малите, но сè попопуларни грчки острови Пакси и Итака би можеле наскоро да воведат посебна туристичка такса за еднодневни посети, како дел од иницијативите за справување со зголемениот притисок од масовниот туризам. Идејата е инспирирана од сличен предлог поднесен од општината на островот Сими, кој веќе се обрати до надлежните власти со барање за воведување таков модел.

Како што информира грчкиот весник Катимерини, градоначалниците на Пакси и Итака го следат исходот од иницијативата на Сими, пред да донесат сопствени одлуки.

Градоначалникот на Пакси, Спиридон Влахопулос, изјави дека доколку Министерството за внатрешни работи даде зелено светло, подготвен е ова прашање да го постави пред локалниот совет и официјално да се разгледа можноста. Од Итака, пак, градоначалникот Дионисис Станицас истакна дека по завршување на туристичката сезона ќе се направи проценка дали е потребно воведување на такса.

Целта на ваквиот чекор е да се обезбедат дополнителни средства за основните јавни услуги, кои се под голем притисок во летниот период, кога бројот на туристи неколкукратно го надминува бројот на постојаните жители. Пакси, Итака и Сими имаат по околу 2.500 до 3.000 жители, но во сезоната се соочуваат со илјадници еднодневни посетители, особено преку организирани тури и крстарења.

Воведувањето на туристичка такса за посетители кои не преноќуваат, според локалните власти, би можело да придонесе кон поодржлив развој на островите и подобрување на квалитетот на живот за локалното население.

Сими предложи симболичен надомест од три евра по посетител, сума што би се користела за инфраструктура, чистење, и подобрување на туристичката услуга. Доколку предложениот модел добие поддршка од грчката Влада, можно е тој да стане преседан и за други мали острови низ Егејот и Јонското Море.