Венеција поради сметот ја забранува храната за носење

Во италијанскиот град Венеција во следните три години ќе биде забрането отворање на нови ресторани кои нудат храна за носење.

Локалните власти ја донесоа оваа мерка со цел да се намали количеството на смет во градот.

Овие правила нема да се однесуваат на продавачите на сладолед, но ќе ги засегнат пицериите и локалите кои продаваат различни видови на брза храна.

Голем број од туристите кои ја посетуваат Венеција претпочитаат да купуваат храна за носење и да јадат додека ги разгледуваат знаменитостите на градот, но потоа зад себе оставаат големи количества на ѓубре што претставува проблем за градот.

Освен тоа, поради остатоците од храна постојано расте бројот на гулаби во градот, кои им создаваат проблеми на локалните жители, и покрај тоа што се воведени строги казни за хранење на овие птици на улица.