Промовиран прирачникот за автентична храна – „Слоу Фуд гостилници“ (ФОТО)

На 23 септември во кафе книжарницата „Литература“ беше промовиран првиот водич на Слоу фуд Македонија, прирачник за добра и автентична храна во интересни гурмански објекти кај нас насловен како „Слоу Фуд гостилници“.

Водичот го претставува гурманското богатство на 17 интересни гостилници во нашата земја, што ја промовираат регионалнaта кујна, локалните вкусови и нашиот гастрономски идентитет.

Предложените места, ресторани, гостилници, деликатесни продавници за вино.., ја потврдуваат тезата дека кај нас во Македонија поради сонцето, гостопримството, амбиентот и пред се, вкусната храна, навистина добро се јаде.

Знак на распознавање е црвеното полжавче што се наоѓа на вратите на локалите а тоа потврдува дека потеклото на храната е локално, високо квалитетно и произведено од малите фармери и занаетчии. Полжавчето ќе ви биде патоказ кон местата каде добро се јаде и пие, дека токму таму има мени- репрезент на локалната кујна што обезбедува одличен квалитет и фер цени во менито.

На овој проект работеше цел тим на стручни соработници на Слоу фуд Македонија, а автор на текстовите е Валентина Вања Тодоровска.