Во Тузла направен најголемиот бурек во светот

На Плоштадот на слободата во  Тузла вчера беше измесен најголемиот бурек на светот, со кој жители на овој босански град ќе се обидат да влезат во Гинисовата книга на рекорди.

Бурекот беше приготвен во тепсија со пречник од шест метри и тежеше околу 650 килограми, што е доволно за дури 5.000 порции.

Подготвувањето на бурекот траеше шест часа и за него локални пекари исукаа кори во должина од 1,5 километри.

– Ќе го поделиме бурекот со народот и дел ќе им испратиме на службите кои за нас се грижат 24 часа, а тоа се пожарникарите, Брзата помош, полиција и Универзитетскиот клинички центар, изјави организаторот на оваа иницијастива Омер Исовиќ.

Тој изјави дека во рок од три месеци треба да добијат потврда дали е соборен Гинисовиот рекорд.

Според Исовиќ, досега најголемиот бурек на светот, со пречник од  5,5 метри, бил направен во Љубљана, но тој не влегол во Гинисовата книга на рекорди.