Поврзи се со нас
Маркетинг

Популарно.мк

Бронзен медал за македонски информатичари на олимпијада во Русија

Наука

Бронзен медал за македонски информатичари на олимпијада во Русија

Младите македонски информатичари освоија бронзен медал на 28. Интернационална олимпијада по Информатика (ИОИ 2016), што од 12 до 19 август се одржува во Казањ, Русија.

Македонија на овој натпревар од областа на програмирањето за средношколци ја претставува тимот составен од натпреварувачите Владимир Максимовски, Димитар Бајрактаров, Никола Стојкоски и Душан Терзиќ, предводени од Емил Станков и Весна Киранџиска од Факултетот за информатички науки и компјутерско инженерство (ФИНКИ).

Во конкуренција на 308 ученици од 86 земји, бронзениот медал го освои 17-годишниот Владимир Максимовски, кој беше на чекор до освојување и на сребрен медал. Останатите тројца македонски натпреварувачи, како што информира Здружението на информатичари на Македонија, исто така постигнале забележителни резултати, при што Димитар Бајрактаров го делеле само неколку поени од освојување на бронзен медал.

– Остварениот резултат претставува нова потврда дека Македонија треба да биде горда на своите млади ученици, кои со своето знаење од областа на компјутерските науки што одново и одново го демонстрираат на интернационалните информатички олимпијади, уште еднаш докажаа дека без сомнение припаѓаат меѓу најдобрите во целиот свет, се наведува во соопштението од Здружението на информатичари на Македонија.

Според претседателот на Здружението на информатичарите на Македонија, Миле Јованов, кој е и член на Интернационалниот комитет на Олимпијадата, овој резултат се должи на континуираната работа на Здружението со учениците и на беспрекорната организација на натпреварите по информатика секоја година.

Од своето прво учество како независна држава на ИОИ во 1996 година, Македонија досега има освоено еден сребрен и 14 бронзени медали, од кои најголемиот број во изминатите неколку години.

Следната Интернационална олимпијада по информатика ќе се одржи во Техеран, Иран.

ИОИ е годишен интернационален натпревар во програмирање за средношколци кој традиционално се одржува во една од земјите – членки на ИОИ заедницата. Во националните натпревари во програмирање на речиси 90 држави од светот секоја година учествуваат околу 250.000 ученици, со желба да се изборат да ја претставуваат својата држава на ИОИ.

Здружението на информатичари на Македонија најави дека во септември Македонија ќе биде домаќин на Јуниорската балканска олимпијада по информатика.

Главниот и одговорен уредник на веб порталот Популарно.мк. Ѓорги е перспективен новинар кој со својата креативност и талент го направи Популарно.мк дел од водечките информативни сајтови во Македонија. Во исто време е регионален известувач за CNN од Македонија и главен на продукцијата GPTM Production.

Повеќе од Наука

Маркетинг
ДО ВРВ
error: Содржината е заштитена со авторски права.