Адриен Броди го собори рекордот за најдолг говор на Оскарите

Адриен Броди, кој е познат по своите долги говори при примање на награди, во неделата официјално го собори рекордот за најдолг говор за примање Оскар во историјата, објавија американските медиуми.

Во неделата, 51-годишниот актер го освои својот втор Оскар за главната улога во историскиот еп „The Brutalist“ на Брејди Корбет. Првиот Оскар го доби во 2003 година за филмот „The Pianist“.

Откако го прими трофејот од добитникот за најдобар актер во 2024 година, Силијан Марфи, Броди продолжи да зборува неверојатни пет минути и 40 секунди.

Тоа е десет секунди подолго од претходната Гинисова рекордерка, Грир Гарсон, која зборуваше пет минути и 30 секунди по освојувањето на Оскар за најдобра актерка во 1943 година за нејзината улога во воената романса „Mrs. Miniver“.

Во својот говор за прифаќање, Броди ги спомна своите конкуренти за наградата за најдобар актер – Колман Доминго, Тимоти Шаламе, Ралф Фајнс и Себастијан Стен – нарекувајќи ги „прекрасни човечки суштества, чија работа зрачи со грациозност, добрина и брилијантност“.

Откако Броди ги достигна доделените 45 секунди што победниците вообичаено ги имаат да зборуваат, започна да свири карактеристичната оркестарска музика во позадина, информирајќи го дека неговото време истече.

Меѓутоа, наместо да го заврши говорот, како што направија многу други победници, Броди им рече да ја прекинат музиката.

„Ќе завршам“, вети тој. „Исклучете ја музиката. Го имам направено ова порано. Ви благодарам. Тоа не е мое прво родео, но ќе бидам краток. Ветувам, нема да претерувам“, рече тој.

На крајот од својот говор тој заклучи: „Ве сакам. Ве ценам сите. Да се бориме за она што е правилно, да продолжиме да се смееме, да продолжиме да се сакаме“.