Македонскиот дух оживеан низ камерна музика: Камерниот ансамбл „Консонанс“ со концертна премиера на „Охридско лето“

Во духот на македонската класична музика, камерниот ансамбл „Консонанс“ вчеравечер ја претстави својата нова програма „Мозаик“ пред публиката на фестивалот „Охридско лето“. Составен од етаблирани музичари од Македонската филхармонија, ансамблот донесе свежа звучна слика во црквата „Св. Софија“, изведувајќи дела од домашни композитори.

Настанот започна со премиерна изведба на „Минијатури“, дело на композиторот Благој Цанев, во нов аранжман направен од неговиот внук, Филип Иванов. Оваа изведба беше дел од одбележувањето на петгодишнината од смртта на Цанев, член на четвртата генерација македонски композитори.

Следеше композицијата „Мозаик“ – оригинално дело на младиот композитор Филип Иванов, специјално напишано за овој состав. Публиката имаше можност да чуе и дела на Дарко Илиевски, кој не само што настапи со хармоника, туку и авторски придонесе со нови дела инспирирани од македонскиот фолклор.

„Тоа не се преработки на фолклор, туку оригинални композиции со македонски дух,“ изјави Маја Чанаќевиќ, која настапи на англиски рог. Таа додаде дека застапеноста на македонски автори и уметници на „Охридско лето“ ја отсликува посветеноста на фестивалот кон националното музичко наследство.

„Настапот на Охридско лето е врв за секој македонски музичар. Благодарни сме што имавме можност да бидеме дел од ова значајно 65-то издание,“ рече Чанаќевиќ, упатувајќи благодарност до организаторите Ѓорѓи Цуцковски и Симона Ѓорчева.

Ансамблот „Консонанс“, формиран во 2007 година, денес е препознатлив по својот разновиден инструментален состав и по интензивната активност на полето на камерната музика.