No Borders Orchestra за првпат во Скопје со турнејата „Turning Point“

Скопје ќе биде домаќин на премиерен настап на реномираниот ансамбл No Borders Orchestra (НБО) – состав од врвни музичари од поранешните југословенски републики. Концертот ќе се одржи на 5 септември во 20 часот во Камерната сала на Македонската филхармонија, во рамките на регионалната турнеја „Turning Point“.

Програмата вклучува ремек-дела за гудачки оркестар: „Адаџето“ од Малер, „Сјајна ноќ“ од Шенберг и „Метаморфози“ од Штраус, како и специјално нарачани композиции од водечки млади композитори – Нина Перовиќ (Црна Гора), Давор Винче (Хрватска), Марко Никодијевиќ (Србија) и македонската авторка Дарија Андовска.

NBO, ансамбл кој ја доби престижната награда „Шампион на регионална соработка“ (2023) и своето прво издание го сними за Deutsche Grammophon, ја носи силната порака дека музиката може да ги надмине разликите и да обедини за подобар свет.