Дуа Липа приреди спектакл во Приштина и ја отвори музичката магија на фестивалот „Сани Хил“ (ФОТО+ВИДЕО)

Приштина блесна под светлата на светската музичка сцена на 1 август, кога глобалната поп ѕвезда Дуа Липа одржа спектакуларен концерт со кој го отвори тридневниот фестивал Sunny Hill.

Со двочасовен настап исполнет со најголемите хитови од нејзината кариера, Дуа Липа ја маѓепса преполната публика. Посебен момент беше нејзиното заедничко изведување на култната песна “Era” со нејзиниот татко, Дукагјин Липа – еден од основачите на фестивалот. Емотивниот дует предизвика силна реакција од публиката која во еден глас ја пееше секоја нота.

Пејачката со албанско потекло, која е родена во Велика Британија, на сцената говореше на албански јазик, изразувајќи огромна благодарност што заедно со семејството успеала да создаде фестивал кој го зближува светот со Косово.

„Среќна сум што можам да бидам тука, дома, и да ја споделам оваа магија со сите вас,“ изјави Дуа Липа пред илјадници обожаватели.

Фестивалот продолжува и наредните денови со настапи на други светски музички имиња, меѓу кои и Шон Мендес, потврдувајќи го статусот на Sunny Hill како еден од водечките музички настани во регионот.

Во објава на Instagram, Дуа напиша: „Прештина, ти благодарам од срце. Тука сум дома. Ве сакам!“ – порака која доби илјадници реакции од нејзините следбеници ширум светот.